INFORMACIA KARING I PRESA

I Serbia mangel te promovisarel i romani kultura thaj edukacia; ande jekh eforto dino vast katar e Fundacie vaš Putardi Societeta, o Konsilo le Evropako thaj i Germania

BELGRADO – O Serbikano Prezidento Aleksandar Vučić dinjas pakiv pal o dujto ofiso le Evropake Romane Institutosko pal Arte thaj Kultura (ERIAC) thaj o nevo butjako kher vaš o Romano Edukaciako Fondo (REF).
O putaripe kaj sas marcine avilo soske i Serbia kerel preparacia te investisarel ando romano antreprenoriato thaj i inkluzia andi publikani administracia.

Vakjarindos pal o putaripe, o Prezidento Vučić phendjas: “O deskeripe le Evropake Romane Institutosko vaš Arte thaj Kultura thaj le Romane Edukaciake Fondosko ando Belgrado sikavel o baro eforto kaj thol i Serbia te garavel pes i romani čhib thaj kultura, i kalitativno edukacia le ternengi thaj jekh maj bari participacia le romengi ando publikano dživipe, marindos pes kontra i diskriminacia thaj dindos respekto pal o socialo sajekhipe thaj pal e manušikane čačimata. Ande kado modo, ame keras jekh maj lačho avutnipe vaš savore themutne, soske jekh maj lačho trajo vaš e roma anel maj lačho živipe vaš i Serbia.”

O Alexander Soros, o dujto šerutno katar e Fundacie vaš Putardi Societeta, dinjas pakiv pal o angažamento le Serbiako savo na maj sas dži akana:
“O Prezidento Vučić kerdjas jekh nevo standardo vaš o Vestikano Balkano – thaj vaš i Evropa – putarindos o dujto ofiso le ERIAC-esko thaj dindos vast o Romano Edukaciako Fondo te paruvel pesko than ando Belgrado. Si miri pakiv kaj akalaver liderja andar o regiono thaj andar i Evropa si te džan pal kado eksemplo. Miro dad o George Soros thaj me rodinjam te promovisaras i edukacia le romengi, i kultura, o šerutnipe le romengo thaj o ekonomikano antreprenoriato le romengo thaj sem lošalo avdives ke zorjardjam lengo eforto.”

O ERIAC mangel te peravel e prežudekate thaj te zorjarel o barikanipe le romengo pal lengo rolo andi evropuni historia thaj kultura. O ERIAC si jekh khetani iniciativa katar o Konsilo le Evropako, e Fundacie vaš Putardi Societeta thaj i Alianca vaš o Evropuno Romano Instituto. O Germanikano Guverno inkerel o centralo ofiso le ERIAC-esko ando Berlino.

Timea Junghaus, le ERIAC-eski Eksekutivo Direktorka:

“Šela beršenge e roma andine pengi kontribucia ko artistikano thaj kulturalo barvalipe andi Serbia thaj ando sasto regiono. Sa kadalenca, kadala kontribucie ačhile butivar bidikhle. O keripe le ERIAC-eske dujto ofisosko si jekh historikano momento. Kado putarel o drom le ERIAC-esko Serbia te aresel jekh vašno faktoro kaj promovisarel i kulturalo inkluzia le romengi andi vibranto thaj vašno kulturalo scena andi Serbia thaj ando regiono.”
Ande sa kodo kher si te ovel vi o Romano Edukaciako Fondo, jekh organizacia kaj kerel buti te barjarel o akceso le romane čhavengo ki edukacia.

Redjepali Chupi, Temporaro Direktoro ko Romano Edukaciako Fondo:
“O REF mangel te kerel jekh avutnipe ande saveste sakojekh šaj te barjarel pesko sasto potencialo thaj kreativiteto. Sem lošalo te phenav mišto aviljan le ERIAC-eske andi amari komuniteta kathe ando Belgrado. Khetanes keras jekh zoralo andrutno ilo, savo mangel te peravel e stereotipurja thaj e prežudekate pal amari komuniteta.”

BAZUTNI INFORMACIA O ERIAC sas biando pal jekh eforto kerdo katar jekh buxli koalicia sikavde romengi, aktivisturja thaj artisturja. Von arakhle džutimos katar o Konsilo le Evropako thaj katar e Fundacie vaš Putardi Societeta, save financisarde o ERIAC khetanes le Aliancasa vaš o Evropuno Romano Instituto vaš Arte thaj Kultura.

O ERIAC sas putardo ando 2017 ando Berlino, kothe kaj si lesko oficialo than, sar organizacia kaj si lan jekh uniko thaj korkoro mandato sar transnacionalo organizacia ke Evropako nivelo vaš o prindžaripe le romane artengo thaj kulturako.

O ERIAC SERBIA si te promovisarel e romane arte thaj i kultura andi Serbia thaj ande sasto regiono, kerindos jekh zoralo impakto ando kulturalo prindžaripe le romengo. Thodo ando ilo le Belgradosko, ko Majke Jevrosime St. 51, o ofiso thaj le artako than ERIAC SERBIA si baro opral 130 metrja ke phuvjako nivelo thaj si les jekh šukar putardo than savo si lačho vaš e artake ekšibicie thaj iventurja.

O ERIAC SERBIA sas oficialo deskerdo ando 25to majo jekhe putarde ceremoniasa, kaj avilo o Prezidento le Serbiako Aleksandar Vučić, o Dujto Šerutno katar e Fundacie vaš Putardi Societeta, o Alexander Soros, thaj sa kadja, o Ambasadoro le Germaniako andi Serbia o Thomas Schieb thaj o Sem Fabrizi o Ambasadoro thaj Šerutno katar i Delegacia le Evropake Uniaki andi Serbia. Pašal i ceremonia sas o putaripe le ekšibiciako “Romani Zor thaj Rezilienca“, kaj sikavel e artake butja kerde katar e akanutne romane artisturja andar sasti Evropa.

De kana sas putardo, o ERIAC areslo jekh prindžardo lidero pal o akanutno romano artistikano vakjaripe, inkerindos šela iventurjenge pal arte thaj kultura pi sasti phuv, vi, maškar averende, ki 58-to Internacionalo Artaki Ekšibicia – ke Biennale di Venezia. O ERIAC phiravel pes sar jekh internacionalo kreativno centro te šaj del vast vaš o paruvipe le kreativno idejengo opral e granice, e kulturalo domenurja thaj e romane identitete, kidindos dži akana 160 membrurja roma thaj gadže opral sasti phuv.