-
Ando 5-to Novembro kana si le Lumjako Dives pal i Romani Čhib, le Evropako Romano Instituto vaš Arte thaj Kultura (ERIAC) del avri jekh kolekcia materialurjengi pal i romani čhib, telal i umbrela katar Barikane Roma Slobodo Evropa.
Kado berš, te del pakiv vaš le Lumjako Dives pal i Romani Čhib, kaj si ando 5-to Novembro sako berš de kana sas lilo samate katar o UNESCO ando 2015, jekh kolekcia materialurjengi pal i romani čhib si dini avri telal i transnacionalo iniciativa Barikane Roma Slobodo Evropa (PRFE), savi mangel te zorjarel i romani identiteta thaj o solidariteto maškar e roma andar verver thema.
E materialurja, save si te arakhen pes pe digitalo platforme katar o PRFE, si kerde te vazden o intereso pal sode vašno si te garavel pes thaj te promovisarel pes i romani čhib. Akana, i Romani čhib si thodi katar o UNESCO ando Lolo Lil pal e Čhibja kaj si andi Dar thaj maškar e 12 -14 milionurja Roma opral sasti phuv, toke štar milionurja maj den duma i romani čhib. Sa kadalenca, o garavipe thaj o barjaripe jekhe khetane dikhimasko vaš lako vakjaripe šaj te anel na toke transnacionalo harmonizacia – ande institucie, andi media thaj ande škole – ama, sa kadja, šaj te del vast te na hasarel pes i čhib.
Maškar e materialurja kaj si te oven dine avri si jekh kolekcia romane poemurjengi xramosarde katar e romane poeturja thaj xramosarne sar si, i Ilija Jovanović vaj i Rani Romani, thaj mišto fakturja pal i romani čhib. Sar kotor andar le ERIAC-eski misia te kerel jekh maj zorali transnacionalo romani identiteta, pe savore materialurja thodjas pes i vizualo identiteta katar i kampania Barikane Roma Slobodo Evropa.
Pardal o cilo le PRFE kampaniako, o ERIAC – ando parteneriato le Evropake Konsilosa thaj le Universitetasa andar o Graz – organizisarel i Dujto Internacionalo Online Konferencia „Lindos sama pal amari Romani Čhib”, savi si te anel khetanes eksperturja te das duma pal o garavipe le čhibjako, pal i transnacionalo harmonizacia thaj pal e praktike kaj si andi edukacia le romane čhibjaki. I Romani Čhib |e Ekšibicie pal i Romani Čhib kaj šaj dikhen pes ke ofisurja le ERIAC-eske andar o Berlino thaj andar o Belgrado si te len samate kado dives.
Vaš penge platforme, si te oven promovisarde vi e lokalo online thaj offline iniciative kerde katar e nacionalo partenerurja pal o advokasi andar o PRFE. Ačhjon amenca vaš maj but nevimata.
Baxtalo Dives le Romane Čhibjako!
