Phen zorales, sem Rom thaj sem Barikano
Ando 1971, e romane aktivisturja andar i Evropa kidine pen ando London te putaren e droma jekhe naciake. Pal 500 berša persekuciake, sklaviake, mudarimaske thaj ekskluziake, ando 8-to Aprilo 1971 von kerde jekh flago, jekh himno thaj jekh transnacionalo identiteta vaš le Evropake 12 milionurja roma (varekana phenel pes lenge džipsies). 50 berša pal kodo but butja paruvdile, ama bezexasa, ačhili but xoli thaj ladžavo kaj kerel amaro dživipe bilačho. Ande pakiv kodole phurengi save avile anglal amende thaj kodola kaj si te bianjon, si te keras o 2021 o berš kaj vazdel o glaso le Evropake bisterde naciako.
I kampania Barikane Roma Slobodo Evropa si pal o vazdipe jekh miškimasko kaj našti te maj ovel bidikhlo, vaj te pakjal pes ke na-i les muj. Le zorasa katar o interneto thaj i socialo media, khetanes le lokalno komunitetake organizacienca thaj le barikane dženenca andar e romane komunitete, si te keras sigurno kaj o berš 2021 aresel jekh aver baza vaš o prindžaripe le romengo. Avili i vrjama te das tele e žanžira andar amare godja thaj ile. Avili i vrjama te keras amare čhaven slobodo thaj te oven barikane vaš soste sam. Avili i vrjama te das pakiv amare phurenge thaj puranenge, save dživisarde thaj marde pen vaš amaro slobodipe te ovas kon sam. Sar phendjas o Martin Luther King:”I xoli našti kerel te nakhel i xoli, samo o kamipe šaj kerel kodo”, akharas tumen te inkeren andi godi o kamipe kaj si tumen vaš i romani kultura thaj identiteto thaj te phenen tumenge ando 2021 Barikane Roma Slobodo Evropa. Kado websito si te ovel pherdo neve modurja sar te keren kodo, astarindos ando 2021 le manušenge ginavimasa.