Sako pašmilaj kana e anglune luludja pharjon e Britanikane Roma thaj e Iriš Travelerja inke mangen te phiren pe droma amare phurenge. Sa ande kodoja vrjama, ando berš le alosarimatengo sar si o 2021, e političarja kaj phiraven rozeta astaren te phiren pe droma thaj te maren ke udara.
E duj grupurja arakhen pen raro, ama ande palutne kurke dine pes dab jekh averesa. Fal pes kaj o politikano intereso le bare partidurengo andar o UK karing e komunitete kerde andar 600,000 britanikane džipsi, roma thaj travelerja, maj palal, len cira atencia. Andi čači rig le politikaki, o legislativo projekto so dikhel i policia, o kriminaliteto, e kondamnacie thaj e instance le krisake andar o konservativo guverno zumaven te inkalen kompleto avrjal o zakono o tradicionalo dživipe le phirutnego. Andi bangi rig, o Britanikano Butjarnengo Partido kerdjas lila ande savende phenel sar si te lel sama pal “le phirutnenge invazie”.
Kana i Ministra pal Andrutne Butja, i Priti Patel si te aresel te kerel nevi definicia pal e Kriminalo Tiknedoša, sar si te les jekh korkoro vurdon thaj te zumaves te bešes pe jekh than kaj na-i tiro, voj si te peravel fundamentalo o čačimos savore britanikane manušengo te ovel len akceso pe thana. Ame sam, pal sar dikhen, i čirikli andi mina le angarengi vaš o slobdipe. Kana i kultura le phirutnengi si dini rigate, savorenge slobodimata si ke jekh paso te aresen andi dar.
Ando 8-to Aprilo pherjon orta 50 berša de kana e romane aktivisturja andar sasti Evropa kidine pen ando London te den penge transnacionalo nacian jekh flago, jekh himno thaj politikano drom. 50 berša maj palal, but andar e dživimata le 12 milionurjenge roma andar i Evropa si inke dine dab katar o rasismo, i xoli thaj i negacia le faktoski ke sam jekh nacia. Sar kadaja komuniteta kaj dživelas pi rig le derjavaki ando Hastings o dives kaj nakhlo, o slobodipe te dživen sar lenge phure si kotor andar lengo identiteto kaj našti džal maj dur, vaj pal 50 berša vi našti te mekel pes.
